domingo, 21 de enero de 2018

TRABALLANDO OS CLÁSICOS: OS TRES PORQUIÑOS

En 5º de Infantil andan a traballar os contos clásicos, polo que, como agasallo, decidimos prepararlles unha sesión de contacontos moi especial, protagonizada por Juan, Claudia, María Estela, Aitana, Diego e Pablo, de 5ºB de Primaria.



Este grupo de actrices e actores xeniais dramatizaron para os tres grupos de 5º de Infantil o conto clásico Os tres porquiños, na versión que Raquel Méndez e Helga Bansch realizaron para OQO Editora.



Nestas sesións, os pícaros de 5º de Infantil desfrutaron, moi atentos, do contacontos:











A continuación, debatemos sobre a historia e a mensaxe que esta nos transmitía. Finalmente, coloreamos uns debuxos alusivos ao conto que acabábamos de escoitar.









Tal e como amosa a foto de abaixo, sen dúbida, unha das persoas que máis desfrutou con esta actividade foi Vega, que puido ver actuar ao seu irmán Juan, no papel de Lobo Feroz.



Nas vindeiras semanas continuaremos a representar para o alumnado de Infantil este e outros contos clásicos, como O traxe novo do emperador ou A ratiña presumida.



viernes, 19 de enero de 2018

UNS DÍAS DE INDIRAS, COCORICOS, CURUXIÑAS E PANCHOS

Estes días continuamos con dúas das nosas actividades favoritas: o teatro e os contacontos. Unha das representacións que máis nos fixo desfrutar foi a realizada por Candela, Martín, Inés, Samuel, Noelia e Jaime, alumnos de 6ºB, que puxeron en escena unha dramatización baseada na obra Indira, escrita por Jorge Miranda e Itziar Miranda, e publicada por Edelvives. Como o seu título indica, a obra preséntanos a figura de Indira Gandhi, e esta foi precisamente a finalidade desta representación: achegar aos pícaros de 4ºC a figura de Indira, unha muller loitadora que chegou a ser Primeira Ministra da India nas décadas de 1970 e 1980.














Para todos os que teñades ganas de achegarvos á figura de Indira, vos recomendamos a obra na que nos inspiramos para realizar esta dramatización: Indira (Edelvives).




Outra das sesións máis divertidas destes días foi a desenvolvida por Alba, Sara, Ainhoa e Rossana, alumnas de 6ºC, que dramatizaron para os alumnos de 4º de Infantil unha das nosas obras favoritas: Cocorico (OQO).






Aqueles que aínda non coñezades este álbum escrito por Marisa Núñez e ilustrado por Helga Bansch, non dubidedes en mergullarvos nas súas páxinas. A bo seguro desfrutaredes coas aventuras de Cocorico, un pitiño que vive feliz coa súa nai, e que se terá que enfrontar ao terrible Gato Pelado.




Os pícaros de 4º de Infantil tamén o pasaron ao grande cunha das últimas obras chegadas á nosa biblioteca: As tres curuxiñas (Kalandraka). Lucía, Ángelo e Muriel, de 5ºB foron, nesta ocasión, os encargados de lela para os pequenos. E logo de escoitar o conto, realizamos unha viaxe polo mundo dos animais a través das obras da colección "O meu pequeno animalario" (Baía edicións).








Convidámosvos a achegarvos a esta obra, con texto de Martin Waddell e ilustracións de Patrick Benson, que nos relata a inquedanza de tres pequenas curuxas mentes agardan polo regreso da súa nai.




E, por último, destacaremos outro dos contacontos destes días, desenvolvido por Ainara, Irene e Alba, de 3ºC, que leron para as nenas e os nenos de 1ºC  o álbum Pancho (Kalandraka), de Antonio Santos. Todos escoitamos moi atentos a historia de Pancho, un pequeno elefante que vivía tranquilo na selva, até que un día chegaron os homes...




E logo celebramos un concurso de debuxo no que cada un de nós debuxou o seu Pancho particular.





Recomendámosvos esta obra, gañadora do Segundo Premio Nacional de Ilustración no 2003.



jueves, 18 de enero de 2018

VIAXAMOS ATÉ ROMANÍA CON NICOLE E COS PÍCAROS DE 3ºB

Como sabedes, este curso andamos a achegarmos ás diferentes nacionalidades presentes no noso colexio, dentro dun proxecto, "UN FOGAR DE PAÍSES", que pretende fomentar valores fundamentais como o respecto, a solidariedade e a amizade entre persoas e culturas. Entre os alumnos de 3ºB de Primaria temos a sorte de contar con Matías, nacido aquí, pero cuxos pais proceden de Romanía. Por esta razón, en 3ºB decidiron que Romanía sería un dos países sobre os que ían investigar este curso. E para achegarnos a Romanía visitou o colexio Nicole, a mamá de Matías, que co seu perpetuo sorriso nos fixo desfrutar enormemente nunha sesión na que nos falou da capital, Bucarest, e das principais cidades do país, dos traxes e das cancións tradicionais, das celebracións máis destacadas, das comidas típicas...



E para terminar de conquistarnos a todos, Nicole nos agasallou cun delicioso biscoito romanés, que todos degustamos con pracer.







Nicole, desde aquí queremos darche as grazas por regalarnos o teu tempo, por todo o que nos ensinaches e polo bo humor que transmitiches en cada unha das túas palabras. Matías ten que estar moi orgulloso da mamá que ten.